Apertura edificio remodela di Magazijn Central BID
Diabierna atardi, a tuma luga e apertura di e edificio remodela di Centraal Magazijn Bureau Interne Diensten (BID). Prome Minister Evelyn Wever-Croes tabata presente, hunto cu "Waarnemend Chef" sr. Ricky Koolman, pa asina ricibi e yabi di e edificio nobo aki.
Durante un entrevista, Prome Minister a splica cu na momento cu su persona como minister encarga a mira e situacion deplorabel cu e edificio ta den, el haci un promesa pa drecha e luga, pa crea un ambiente mas agradabel pa e empleadonan. E promesa aki a wordo cumpli diabierna ultimo, na momento cu e yabi di un hoya di edificio a wordo entrega na su persona.
Durante e actividad aki, por a nota e felicidad y emocion den cada un presente. Sr Koolman a tuma e oportunidad pa gradici Prome Minister pa no solamente a scuchanan, sino pa ta e unico mandatario cu a cumpli cu nan.
El a indica cu Su Excelencia, Prome Minister Evelyn Wever-Croes ta e unico cu a "walk su talk", cu despues di un bishita, a percura pa duna e luga un "facelift" y a drecha e bañonan. Despues a sigui cu e trabounan di remodelacion pa awe, nan ta para den un luga limpi, den bon estado, nobo y hopi mas grandi. "Di mi curason mi ta gradici Prome Minister pa tur su esfuerso den cumpli cu nos deseo di hopi aña. Nos tabata traha den un situacion deplorabel, y un edificio cu no tabata apto pa por cumpli cu nos debernan efectivamente. Danki na e remodelacion aki, nos empleadonan por duna un servicio mas eficiente na e otro departamentonan di gobierno" tabata palabranan di sr Koolman.
Galeria di potret
Fuente: Pagina di Facebook Gabinete Wever Croes